दार्जिलिङ, २८ दिसम्बर:रङ्ली रङ्लियट थानाअन्तर्गत लप्चु ११ माइलमा आगलागी हुँदा दुईजनाको मृत्यु भएको छ।
यो मर्मान्तिक घटना हिजो सोमबार राति करिब ११:३० बजे भएको हो।
जानकारीका अनुसार हिजो राति लप्चु ११ माइलनिवासी भीम भुजेलको घरमा आगलागी हुँदा उनकी श्रीमती भूमिका भुजेल (थापा) र छिमेकी विकास गुरुङको घटनास्थलमै मृत्यु भएको हो।
आगलागीका कारण घरभित्र रहेका दुईवटा सिलिन्डर पड्किँदा दुवैजनाको मृत्यु भएको बताइएको छ। भुजेलको घर पनि जलेर खरानी भएको छ।
मृतक विकास गुरुङ सोनादा ८ माइलनिवासी हुन्। उनी करिब दुई वर्षदेखि लप्चु ११ माइल बस्दै आएका थिए। हिजो भीम भुजेलको घरमा आगो लागेको थाह पाएपछि आगो निभाउन जाँदा सिलिन्डर पड्किएर गुरुङको पनि मृत्यु भएको हो।
घर छेवै राखिएको भीम भुजेलको एउटा यात्रीवाहक वाहन पनि आगलागीका कारण जलेको छ।
अर्कोतर्फ दुवैजनाको शवलाई पोस्टमर्टमका लागि पठाइएको छ।
