कालेबुङ, ११ जनवरीः कालेबुङको लोअर टासिडिङमा भएको दम्पती हत्याका आरोपितलाई पुलिसले पक्राउ गरेको छ।
पुलिस सूत्रका अनुसार पक्रा परेका आरोपितका नाम कृष्ण प्रधान हो। आरोपित तीन माइलनिवासी नै रहेको पनि पुलिस सूत्रले बताएको छ।
जानकारीका अनुसार उनलाई पुलिसले हिजो सोमबार राति पक्राउ गरेको हो।
पुलिस सूत्रले थप बताएअनुसार ३३ वर्षीय आरोपित कृष्ण प्रधानले आफूले ती दम्पतीको हत्या गरेको स्विकारेका छन्।
आज यी आरोपितलाई कालेबुङ जिल्ला अदालतमा उभ्याइने जानकारी पाइएको छ।
स्मरण रहोस्, पछिल्लो २८ दिसम्बरका दिन कालेबुङको तीन माइलस्थित लोअर टासिडिङमा दम्पती खड्गबहादुर खड्का उर्फ शम्भु छेत्री र विष्णु छेत्रीको जघन्य हत्या भएको थियो।
दम्पती हत्याको यस जघन्य घटना प्रकाशमा आए लगत्तै घटनास्थलमा पुगेर कालेबुङ पुलिसले अनुसन्धान शुरू गरेको थियो भने करिब दुई साताको अवधिभित्र हत्याका आरोपितलाई पक्राउ गर्न पुलिस सफल बनेको छ।
