सिलगढ़ी, 7 मार्च : बिहीवार बाघडुग्रा हवाईअड्डाबाट 9 वटा सुनको बिस्कुटसहित एक युवक पक्रा परेका छन्। आज मध्याह्न 12 बजे बाघडुग्राबाट दिल्लीका लागि उड्ने एअर एशियाको विमान नम्बर 15-768 को सीट नम्बर 9 ‘डी’-मा बसेका अमित नामक युवकबाट 9 वटा सुनको बिस्कुट बरामद गरेको हो।
तलाशीअवधि सुनसहित ती युवकलाई पक्राउ गरिएको बताइएको छ। पुलिसका अनुसार सुन तस्कर अमितले कम्मरमा सुन लुकाएका थिए। बरामद गरिएको सुनको ओजन 1500 ग्राम रहेको बताइएको छ भने यसको अन्तरराष्ट्रिय मूल्य लगभग 49 लाख आँकिएको छ।
पुलिस सूत्रका अनुसार पक्रा परेका आरोपी तस्कर दिल्ली निवासी हुन्। उनले उक्त सुन कहाँबाट ल्याइएको हो र कहाँ तस्कर गरिने योजना थियो, त्यसबारे जाँच भइरहेको छ।
सीआईएसएफले आरोपी युवकलाई पक्राउ गरेपछि कस्टम विभागमा सुम्पिएको छ। कस्टम विभागले आवश्यक कारबाही गरेपछि थप जाँचका लागि आरोपीलाई बाघडुग्रा थानामा सुम्पिनेछ।
