-रत्न लक्सम सुब्बा
भन्नेले भन्छ
सत्य तीतो हुन्छ
सत्य तीतो हुन्छ
वा मीठो हुन्छ ।
त्यो जिन्दगीको
बचाइले भन्छ ।
जिन्दगीको बचाइ
सुन्दर छ
कि कुरूप ?
जिन्दगीको बचाइ
कल्याणकारी छ ?
कि अनर्थकारी ?
जिन्दगी बाँच्नु
र बचाइले
परिणामको
मापदण्ड तय गर्छ ।
जो बद्लिरहन्छ
त्यहाँ सत्यको
एक अंश पनि
समाहित हुँदैन ।
जो कहिल्यै बद्लिदैन ।
अव्यय र अविनाशी हुन्छ ।
त्यहाँ अदृश्यरूपमा
सत्यको उपस्थिति भइरहन्छ ।
जो निराकार छ
जसमा शक्ति
अनि
सामर्थ्यको अग्निकुण्ड हुन्छ ।
यसैले सत्यको जय भइरहन्छ ।
