सिलगढी, २१ नोभेम्बरः हात्तीको आक्रमणमा परी दुई महिलाको मृत्यु भएको छ भने एक महिला गम्भीर घाइते बनेकी छन् ।
यो घटना आज बाघडुग्रादेखि केही टाढा सेन्ट्रल फरेस्ट बस्तीमा भएको हो ।
जानकारीका अनुसार आज बिहान करिब ११ बजे हात्तीको आक्रमणमा परी ४५ वर्षीय देवी तामाङ र ४८ वर्षीय सावित्री सुब्बाको मृत्यु भएको हो ।
त्यसैगरी ५२ वर्षीय गीता सुब्बा गम्भीर घाइते बनेकी छन्, जसको उपचार बाघडुग्राको एक निजी अस्पतालमा चलिरहेको छ ।
प्राप्त जानकारीका अनुसार उनीहरू गाउँ छेवै रहेको जङ्गलमा घाँस काट्न गएका थिए । त्यहीं उनीहरूलाई हात्तीले आक्रमण बताइएको छ ।
स्थानीय मानिसहरूका अनुसार आज हात्तीको आक्रमणमा परी गम्भीर घाइते बनेकी गीता सुब्बाका पतिको पनि २००५ मा हात्ती आक्रमणबाटै मृत्यु भएको थियो ।
आजको यस मर्मान्तिक घटनाले सेन्ट्रल फरेस्ट बस्तीका वासिन्दाहरू अवाक् बनेका छन् ।
