गान्तोक, २२ दिसम्बरः सिक्किमनिवासी साहित्यकार सुवास दीपकलाई यस वर्षको बद्रीनारायण प्रधान स्मृति पुरस्कार अर्पण प्रदान गरिने निर्णय गरिएको छ।
पुरस्कार चयन समितिका संयोजक डा. मोहन पी. दाहालको अध्यक्षतामा मतिगडास्थित उनको निवासमा आज बसेको चयन समितिको बैठकले विशिष्ट साहित्यसाधक सुवास दीपकलाई तेह्रौँ बद्रीनारायण प्रधान स्मृति पुरस्कारले अलङ्कृत गर्ने निर्णय गरिएको हो।
१ अप्रेल १९४८ मा पञ्जाबको कङ्गडामा जन्मिएका सुवास दीपकको वास्तविक नाम सुवासचन्द्र डोगरा हो।
पाँच दशकभन्दा लामो समयदेखि साहित्यको मौलिक र अनुवाद दुवै क्षेत्रमा निरन्तर कलम चलाउँदै आएका सुवास दीपकका नेपालीमा चारवटा मौलिक कृति प्रकाशित छन्, जसमा बाल उपन्यास अभिषेक, अन्तर्वार्ता सङ्ग्रह साक्षात्कार, कविता सङ्ग्रह आधारशिला र भाषा मान्यता छन्।
हिन्दी भाषामा उनका सातवटा मौलिक कृति प्रकाशित छन्।
सुवास दीपक कुशल अनुवादक पनि हुन्। अनुवादको क्षेत्रमा उनको एउटा विशिष्ट स्थान छ। उनले नेपालीबाट हिन्दी, हिन्दीबाट नेपाली, डोगरीबाट नेपाली, अङ्ग्रेजीबाट नेपाली र अङ्ग्रेजीबाट हिन्दी गरी झण्डै दुई दर्जन पुस्तकको अनुवाद गरेका छन्।
उनलाई २००३ मा डोगरी उपन्यास पल-खिन-को नेपाली अनुवादका लागि साहित्य अकादमी अनुवाद पुरस्कार प्राप्त भएको थियो।
भर्खरै उनले एक शताब्दीभित्रका नेपाली कथाहरूलाई हिन्दीमा अनुवाद गरी भारतीय नेपाली कहानी : एक सदी सफर प्रकाशित गरेका छन्।
यो महत् पुस्तकको प्रकाशक चरित्र प्रकाशन कालेबुङ हो।
यसैगरी सुवास दीपकले धेरै पत्र पत्रिकाको पनि सम्पादन गरेका छन्।
उल्लेखनीय छ, सन् २०१२ देखि प्रत्येक वर्ष बद्रीनारायण प्रधान स्मृति प्रतिष्ठानले सर्वभारतीय स्तरमा यो पुरस्कार नेपाली साहित्यका विशिष्ट साहित्यकारलाई प्रदान गर्दै आएको छ।
आउँदो १४ जनवरी २०२४ का दिन बाग्राकोट, डुवर्समा आयोजना हुने ९६औँ बद्रीनारायण प्रधान स्मृति जयन्तीको अवसरमा एक भव्य समारोहमा सुवास दीपकलाई यो पुरस्कार अर्पण गरिनेछ।
