दार्जिलिङ, १९ फरवरीः सुन्तले पुजबजारनिवासी साहित्यकार कैलाश पाण्डेको निधन भएको छ । उनको गान्तोकको सोचेग्याङस्थित एसटीएनएम अस्पतालमा आज बिहान भएको हो । उनी ४३ वर्ष पुगेका थिए ।
पत्थरी अप्रेसनका लागि पाण्डेलाई केही दिन अघि यस अस्पतालमा भर्ना गरिएको थियो । अप्रेसनको मिति भोलि (मङ्गलबार) तोकिएको थियो, तर, आज बिहान लगभग ७.३० बजे अचानक हृदयघातका कारण उनको निधन भएको पारिवारिक सूत्रले बताएको छ ।
फरवरी १९८१ मा जन्मेका कैलाश पाण्डेले विद्यार्थीकालदेखि साहित्य लेखन सुरु गरेका थिए । उनको साहित्यकार कमल भट्टाराईसँग संयुक्त कृति कोसेलीहरू (प्रकाशनवर्ष दिसम्बर २००१) प्रकाशित छ ।
पाण्डेका फुटकर कविता र लेख रचना विभिन्न प्रकाशित छन् ।
उनको एउटा कविता सङ्ग्रह पनि प्रकाशनको तयारीमा छ ।
उनी बिजनबारीका साहित्यिक संस्था प्रतिभा प्रेरणा परिषद्का उपाध्यक्ष पदमा थिए ।
साहित्यकार कैलाश पाण्डेले आफूपछि आमा, श्रीमती र दुई छोरी छाडिगएका छन् ।
