दार्जिलिङ, 24 मार्चः राजु विष्ट दार्जिलिङ संसदीय क्षेत्रबाट पुनः भाजपा उम्मेदवार बनेका छन् ।
आज भाजपाले जारी गरेको उम्मेदवारहरूका सूचीमा राजु विष्टको नाम परेको हो ।
हिजोसम्म दार्जिलिङ संसदीय क्षेत्रबाट भाजपाको उम्मेदवारलाई लिएर अन्योल बनेको थियो, किनभने उम्मेदवारको दाबेदारमा पूर्व विदेश सचिव हर्षवर्धन शृङ्गलाको पनि नाम अघि आइरहेको थियो ।
यसैबिच आज, राजु विष्टलाई टिकट दिएपछि पहाडका भाजपा कार्यकर्ताहरू खुसी बनेका छन् । किनभने विष्टलाई नै टिकट दिनुपर्ने माग भाजपा कार्यकर्ताहरूको थियो ।
उनीहरूमध्ये धेरैले त राजु विष्टको सट्टा हर्षवर्धन शृङ्गलाले दार्जिलिङ पहाडबाट टिकट पाएको खण्डमा पार्टी छाड्ने मुड बनाएका थिए ।
उनीहरूका भनाइ थियो – पाँच वर्षको कार्यकालमा राजु विष्टले जाति र पार्टीका लागि धेरै कार्य गरेका छन् । यसैले राजु विष्टलाई नै पार्टीले टिकट दिइनुपर्छ ।
पहाडमा भाजपाका घटक दलहरूमध्येका एक गोरामुमोले पनि राजु विष्टले नै टिकट पाउनुपर्ने माग गरिरहेको थियो ।
उल्लेखनीय छ, 2019 को लोकसभा चुनाउमा राजु विष्टले तृणमूल कङ्ग्रेस उम्मेदवार अमरसिँह राईलाई चार लाख तेह्र हजार चार सय त्रिचालिस मतले पराजित गरेका थिए ।
