दार्जीलिङ, २९ मार्च : पहाड़को सर्वाङ्गीन विकासका लागि तृणमूल उम्मेद्वार अमरसिंह राईलाई भोट दिने तृणमूल नेता राजेन मुखियाले जनतासँग अपील गरेका छन्।
शुक्रबार बिजनबारीमा सम्पन्न विनयपन्थी गोजमुमो र तृणमूलको संयुक्त चुनावी सभालाई सम्बोधन गर्दै मुखियाले यस्तो अपील गरेका हुन्। तृणमूल नेता मुखियाले भाजपाले पहाड़लाई घरी घरी धोका दिइरहेको बताउँदै पहाड़विरोधी यस्तो पार्टीलाई भोट दिनु भनेको आफ्नै खुट्टामा बञ्चरो हान्नुजस्तै रहेको बताए।
अर्कोतिर, विनयपन्थी गोजमुमो नेता सतीश पोखरेलले पनि यसपटकको चुनाउमा जनताले विवेकपूर्वक तृणमूल उम्मेद्वार अमरसिंह राईलाई भोट दिने अपील गरे। ‘‘हामीलाई गद्दार भन्ने गोरामुमोले आफ्नो अनुहार ऐनामा हेर्नुपर्छ’’, पोखरेलले थपे, ‘‘१०५ दिनको पहाड़ बन्दमा केही नबोल्ने भाजपाले पहाड़का लागि केही गर्छ भन्नु हास्यास्पद कुरा हो।’’
सभालाई गोजमुमो दार्जीलिङ महकुमा समितिका अध्यक्ष आलोककान्तमणि थुलुङ, कोर कमिटीका सदस्य विक्रम राई, तृणमूल नेतृ शारदा सुब्बा ले पनि सम्बोधन गरेका थिए।
सभालाई एलएम लामाले अध्यक्षता गरेका थिए।
