दार्जीलिङ, २० अप्रेल : गोर्खा राष्ट्रिय मुक्ति मोर्चा (गोरामुमो) दार्जीलिङ ब्राञ्च कमिटीले भाजपा उम्मेदवार राजु विष्टको पक्षमा मतदान गर्ने सबैलाई धन्यवाद दिएको छ।
शनिबार ब्राञ्च कमिटीका प्रवक्ता सन्दीप लिम्बूले विष्टलाई मतदान गर्ने एवं दार्जीलिङ पहाड़मा शान्तिपूर्ण मतदानका लागि योगदान पुऱ्याउने सबैप्रति आभार प्रकट गरेका छन्।
उनले विशेषगरी पुलिस प्रशासन, अर्धसैनिक बल र मतदान केन्द्रमा खटिएका पुलिङ एजेन्टलगायत अन्यप्रति पनि आभार प्रकट गर्दै दार्जीलिङ पहाड़मा शान्तिपूर्ण मतदान सम्पन्न हुनमा उनीहरूको ठूलो योगदान रहेको बताएका छन्।
लिम्बूले मतदाताहरूलाई धन्यवाद दिँदै भाजपा उम्मेदवार राजु विष्टको जीत शतप्रतिशत निश्चित रहेको दाबी गरेका छन्।
“जसले जातीय एकता, जातीय अस्तित्व, अस्मिता र गोर्खाल्याण्डलाई सम्झेर हाम्रा उम्मेदवार राजु विष्टलाई मतदान गर्नु भयो, उनीहरू सबैलाई हामी विशेष धन्यवाद दिन्छौं”, उनले थपे, “हामीलाई विश्वास छ, यसपालिको चुनाउमा गोर्खाहरूको स्वाभिमानले जित्नेछ। गोर्खाल्याण्डपक्षले जित्नेछ।२३ मईको दिनको दिन जब मतगणना हुन्छ, त्यसबेला राजु विष्टको जीतलाई लिएर हामी शतप्रतिशत निश्चित छौं। विश्वस्त छौं।”
उनले यसपालि ‘पार्टीभन्दा जाति ठूलो, जातिभन्दा माटो ठूलो’ भन्ने कथनलाई प्रमुखता दिएर जनताले जात धर्म र सम्प्रदाय सबै भावना त्यागेर एकमत भइ भाजपा उम्मेदवार राजु विष्टको पक्षमा आफ्नो बहुमूल्य मतदान गरेको पनि बताए।
गोरामुमो दार्जीलिङ ब्राञ्च कमिटीका प्रवक्ता लिम्बूले लोकसभा चुनाउमा बनिएको गठबन्धनले लिएको निर्णयलाई जनताले आगामी दिनमा पनि स्वीकार गर्नेछन् भन्ने कुरामा गोरामुमो विश्वस्त रहेको बताएका छन्।
