खरसाङ, १० जुलाई : केही दिनदेखि अविरल परिरहेको पानीको मङ्गलबार राति घैयाबारी नजिक १४ माइलमा गएको पैह्रोको चपेटमा परी नवराज प्रधानको घर पूर्ण रूपले क्षतिग्रस्त छ।
पीड़ित प्रधानका अनुसार पैह्रो हिजो राति करिब १२:१० बजे गएको हो। घरमाथि सोह्रोरिएर झरेको पैह्रोले उनको घरलाई पूर्ण क्षति पुऱ्याएको छ।
‘हामी सुतिरहेका थियौं। करिब १२:१० बजे केही ढुङ्गा झरेर घरमा लागेको थाह पाएपछि हतार हतार परिवार नै भाग्यौं’, उनले थपे, ‘हामी भागेको केही मिनटपछि नै ठूलो पैह्रो झरेर हाम्रो घरको आधा भागलाई पुऱ्यो।’
पीड़ित प्रधान भन्छन्, ‘भागेर ज्यान जोगाउन सक्यौं। ढुङ्गा झरेको थाहा नपाएको भए केही पनि हुनसक्थ्यो।’
उक्त पैह्रोकै कारण प्रधानगायत सचिन विश्वकर्म, विजय रसाइली र रिना विश्वकर्मको परिवार पनि विस्थापित बनेका छन्। नवराज प्रधानको परिवार अहिले आफन्तको घरमा आश्रय लिएका छन् भने अन्य तीन परिवारलाई स्थानीय प्राथमिक पाठशालामा सारिएको छ।
