सिलगढ़ी, २५ अगस्त : सिलगढ़ीमा एकपछि अर्को गरी लुटपाटको घटना प्रकाशमा आइरहेको छ। शनिवार शहरको झङ्कार मोडस्थित एक निजी गोल्ड फाइनेन्स कम्पनीमा सुन र नगद लुटपाटको सनसनीपूर्ण घटना सेलाउन नपाउँदै फेरि शहरकै घोघोमालीमा सुन र नगद राशि लुटपाट गरिएको घटना प्रकाशमा आएको छ। जानकारीका अनुसार उक्त घटना घोघोमाली मेन रोडमा भएको हो।
पुलिस सूत्रका अनुसार उज्ज्वल कर्मकार नामक स्वर्ण व्यवसायीको दोकानबाट आज बिहान दुईजना बदमाशले सुन-चाँदीका गरगहना र नगद राशि लुटेर चम्पट कसे। जतिबेला ती दुई बदमाशले सुन-चाँदीका गरगहना लुटेर चम्पट कसे, त्यतिबेला व्यवसायी कर्मकारले भर्खरै दोकान खोलेका थिए।
प्राप्त जानकारीका अनुसार उनी एक ब्यागमा सन-चाँदीको गहना र केही नगद लिएर दोकान पुगेका थिए। दोकान खोलेर सफा गरिरहेको समय दुई बदमाश आएर उक्त ब्याग लिएर त्यहाँबाट भागे। उज्ज्वल कर्मकारका अनुसार ब्यागभित्र गरगहनाबाहेक तीस हजार नगद राशि पनि थियो। यो घटनापछि क्षेत्रमा व्यापक तनाउ बढ़ेको छ। सीसीटीभी फुटेज हेरेर आसीघर पुलिसले आरोपी लुटेराहरू चिह्नित गर्ने कोशिश गरिरहेको छ।
