दार्जीलिङ, 13 अक्टोबर : समाज र परिवारबाट उपेक्षित, अवहेलित असहाय मानिस र रोगीहरूको सेवामा रमाउँदै आएको नमस्ते फाउण्डेशनले शनिवार चौरस्तामा सेवाकार्य ‘मेनोर एक्टिभिटिज’ गर्यो।
दशैंको उपलक्ष्यमा ‘असहायहरूसँग दशैं’-को उद्देश्य राखेर फाउण्डेशनले हिजो उक्त सेवाकार्य गरेको थियो। यसअवसरमा फाउण्डेशनका सदस्यहरूले चौरस्ता वरिपरिका भेटेका असहाय र वृद्ध-वृद्धाहरूलाई टीका लगाइदिनका साथै भोजन गराएका थिए।
फाउण्डेशनकी अध्यक्ष पिङ्की विश्वकर्मले बताएअनुसार ती मानिसहरूको निधार खाली नरहोस् भनेरै हिजो नमस्ते फाउण्डेशनले चौरस्तामा टीका लगाइदिने कार्य गरेको हो। यसअवसरमा उपस्थित सदस्यहरूले उत्साहपूर्वक भाग लिएका थिए। उनले दशैं कार्यक्रममा सहयोग गर्ने सबैप्रति आभार प्रकट गरेकी छन्।
उल्लेखनीय छ, नमस्ते फाउण्डेशनले लगातार समाज र परिवारबाट उपेक्षित र अवहेलित असहाय, रोगी तथा वृद्ध-वृद्धाहरूलाई स्याहार-सुसार गर्नेजस्ता सेवाकार्य गर्दै आएको छ।
