सिलगढ़ी, २४ अक्टोबर : मिरिक खण्डअन्तर्गत् च्याँगा बस्तीमा हात्तीको आक्रमणबाट एक वृद्धाको मृत्यु भएको छ। मृतकको नाम शान्ति माया गहतराज (७०) बताइएको छ।
जानकारीका अनुसार आफ्ना पतिसँग वर्निङ वकबाट फर्किरहेका समय बिहीवार बिहान करिब ६ बजे मूल बाटोमा हात्तीले आक्रमण गर्दा उनको मृत्यु भएको हो। मर्निङ वकबाट फर्किरहेको बेला हात्तीसँग दम्पत्तिको जम्काभेट भएको बताइएको छ। हात्तीले पहिला मृतकका पति मणिकुमार गहतराजलाई सुँढ़ले एकातिर फ्याँकेपछि शान्तिमाया गहतराजमाथि आक्रमण गरेका थिए।
अर्कोतिर, हात्तीको आक्रमणमा परी गम्भीर घाइते भएका मणिकुमार गहतराजलाई सिलगढ़ीस्थित एक नर्सिङ होममा भर्ती गरिएको छ।
यसैगरी मृतकको शान्ति मायाको शवलाई पोस्ट मर्टमका लागि उत्तर बङ्गाल मेडिकल कलेज एवं अस्पतालमा पठाइएको छ। यो घटनापछि क्षेत्रमा शोकको लहर छाएको छ। जानकारीका अनुसार क्षेत्रमा केही समयता हात्तीको ताण्डव बनेको छ। यसैले पनि क्षेत्रवासीले असुरक्षित महसुस गर्न थालेका छन्।
हात्तीको आक्रमणले वृद्धाको मृत्यु भएको खबर सुनेपछि मिरिक खण्ड विकास अधिकारी अमिताभ ब्यानर्जीलगायत पानीघट्टा रेञ्जका बीट अधिकारी तथा अन्य घटनास्थलमा पुगेका थिए। स्थानीय मानिसहरूले क्षेत्रमा हात्तीको ताण्डवलाई रोक्नका लागि ठोस पदक्षेप उठाउनुपर्ने माग गरेका छन्।
