सिलगढ़ी, 24 नोभेम्बरः शनिवार आफ्ना तीन साथीसँग दुधेमा घुम्न र पिकनिक खेल्न गएका पुलिसकर्मी सुरजीत दत्तको सड़क दुर्घटनामा परी मृत्यु भएको छ। जानकारीका अनुसार यो दुर्घटना पानीघट्टा थानाअन्तर्गत कदमा मोडमा हिजो बेलुकी भएको हो।
वाहन अनियन्त्रित भएकै कारण बीभत्स दुर्घटना भएको बताइएको छ। घटनामा तीनजना गम्भीर घाइते भएका छन्। जानकारीका अनुसार बाघडुग्रानिवासी सुरजीत दत्त सिलगढ़ी मेट्रोपोलिटन पुलिस कमिश्नरेटमा कार्यरत् थिए।
पानीघट्टा पुलिस सूत्रका अनुसार सुरजीत दत्त आफ्ना तीनजना साथीसँग एक कारमा सवार भई पिकनिक खेल्नका लागि दुधे गएका थिए। बेलुकी पिकनिक खेलेर फर्किरहेको समय उनीहरू सवार कार अनियन्त्रित भएर सड़कमा पल्टियो।
सुरजीतको शिरको गम्भीर चोट लागेको कारण उनको मृत्यु भएको बताइएको छ। घटनाबारे सूचना पाएलगत्तै पानीघट्टा पुलिस घटनास्थलमा पुगेको थियो। पुलिसले घाइतेहरूलाई तत्कालै अस्पताल पुर्याएको थियो।
अर्कोतिर, आज उत्तर बङ्गाल मेडिकल कलेजमा पोस्टमर्टम गरी शव सुरजीतका परिवारलाई सुम्पिएको छ। पुलिसले दुर्घटनामा परेको वाहनलाइ आफ्नो कब्जामा लिएर घटनाबारे जाँच गरिरहेको बताइएको छ।
