खरसाङ, ९ नोभेम्बरः सोमवार अपराह्न राष्ट्रिय राजमार्ग ५५-मा भएको सड़क दुर्घटनामा परी तीनधारे थानामा कार्यरत् सिभिक पुलिस सन्तोष दासको मृत्यु भएको छ।
तीनधारे पुलिस सूत्रका अनुसारका अनुसार तीनधारेनजिक चुनभट्टी गोलाइमा बालुवा लादिएको डब्ल्यूबी ७३ एफ १४१७ नम्बरको ट्रिपरले डब्ल्यूबी ७४ एवाई १४९३ नम्बरको बाइकलाई ठक्कर दिँदा सिभिक पुलिस दासको घटनास्थलमै मृत्यु भएको हो।
जानकारीका अनुसार यो दुर्घटना आज अपराह्न करिब १:३० बजे भएको हो। दुर्घटनापछि ट्रिपरका चालक भागेका छन् भने आरोपी ट्रिपरलाई तीनधारे पुलिसले जफत गरेको छ। पुलिसका अनुसार शवलाई पोस्टमर्टमका लागि उत्तर बङ्गाल मेडिकल कलेज एवं अस्पताल पठाइएको छ।
जानकारीका अनुसार उक्त ट्रिपर बालुवा लिएर तीनधारेतर्फ आइरहेको थियो भने बाइकमा सवार भई ती सिभिक पुलिस सिलगढ़ीतर्फ गइरहेका थिए। मृतक सिभिक पुलिस तीनधारे शङ्करनिवासी हुन्।
