गान्तोक, १० मार्चः पूर्व सिक्किमको लिङ्ताममा पैह्रोले सुमो वाहनलाई किच्याउँदा दुई पर्यटकसहित तीनजनाको मृत्यु भएको छ।
मर्नेहरूमा वाहनका चालक पनि छन्, जबकि अन्य 9 पर्यटक घाइते भएका छन्।
पूर्व सिक्किमका पुलिस अधीक्षक हरि छेत्रीका अनुसार आज अपराह्न करिब २ बजे भएको हो।
उनका अनुसार लिङ्तामस्थित किउ खोलामा माथिबाट झरेको पैह्रोले एसके ०१ जे १८७७ नम्बरको वाहनलाई किच्याउँदा कालिकापुर बारासतनिवासी झरना साह (४८) र मुरारी पुकुर रोड कोलकातानिवासी हर्षप्रिया घोष (१३)-लगायत माङ्जिङ लिङ्मो दक्षिण सिक्किमनिवासी वाहन चालक सुरज छेत्रीको घटनास्थलमै मृत्यु भएको छ।
घाइते अन्य सातजनालाई तत्कालै उद्धार गरी उपचारका लागि अस्पताल पठाइएको छ।
घाइतेहरूमा तपस साह, नारायण घोष, सुब्रतो दास, कुञ्जला साह, देवजनी साहा, मीठु घोष, ऋषि घोष, अनु घोष र राजा साह छन्।
जानकारीका अनुसार उक्त ससाना नानीहरूसहित ११ पर्यटक सवार थिए। पुलिसका अनुसार दुर्घटनामा परेका पर्यटक सबै पश्चिम बङ्गालको बारासतनिवासी हुन्।
